अन्नपूर्ण आधार शिविरबाट फर्कने क्रममा हिम पहिरोमा परेर बेपत्ता भएका चिनियाँ पदयात्रीको शव फेला परेको छ । चैत ११ मा कास्कीको अन्नपूर्ण गाउँपालिका–११ देउरालीस्थित चुम्रुङमा हिम पहिरोमा बेपत्ता भएका २८ वर्षीय चेङ युआनको शव शनिबार फेला परेको प्रहरीले जनाएको छ । 

उनी सम्पर्कमा नआएपछि सुरुमा स्थानीय र नेपाल प्रहरीको टोलीले खोजी गरेको थियो । त्यसपछि चैत १६ मा सशस्त्र प्रहरी बलको नम्बर–२४ गणको हेडक्वार्टर कालिका गण पोखराबाट सशस्त्र प्रहरी निरीक्षक विश्वराज त्रिपाठीको कमाण्डमा विशेष विपद् उद्दार टोली खोजीमा खटिएको थियो । 

चुम्रुङस्थित मोदी नदी किनारबाट २० मिटर उत्तरतर्फ झोलासहित घोप्टो परेको अवस्थामा शनिबार बिहान शव भेटिएको कालिका गणका गणपति एसपी सूर्यप्रसाद तिमिल्सिनाले जानकारी दिनुभयो । 

घटनाको जानकारी पाएपछि युआनको परिवार नेपाल आएको छ । काठमाडौं महाराजगञ्जस्थित त्रिवि शिक्षण अस्पतालमा पोष्टमार्टमपछि शव परिवारको जिम्मा लगाउने प्रहरीले जनाएको छ ।