बर्नमाउथले इंग्लिस प्रिमियर लिग फुटबलमा वेस्ट ह्याम युनाइटेडलाई बराबरीमा रोकेको छ । घरेलु मैदान भाइटालिटी स्टेडियममा गएराति भएको खेलमा बर्नमाउथले पाहुना टोली वेस्ट ह्यामलाई १–१ गोलको बराबरीमा रोकेको हो । 

खेलको पहिलो हाफ गोलरहित बराबरीमा सकिएको थियो । दोस्रो हाफमा वेस्ट ह्यामले १–० को अग्रता लियो । लुकास पकेटाले खेलको ८७ औं मिनेटमा पेनाल्टी मार्फत वेस्ट ह्यामलाई अग्रता दिलाएका थिए । तर, पाहुना टोलीले यो अग्रतालाई जोगाउन सकेन । 

वैकल्पिक खेलाडी एनेस उनलले खेलको ९० औं मिनेटमा घरेलु टोलीका लागि बराबरी गोल फर्काए । यो नतिजासँगै बर्नमाउथ १६ खेलबाट २५ अंकका साथ तालिकाको छैटौं स्थानमा रह्यो । समान १६ खेलबाट १९ अंक जोडेको वेस्ट ह्याम भने १४ औं स्थानमा रहेको छ ।