नेपालले एसीसी यू–१९ महिला एसिया कप क्रिकेटमा आज श्रीलंकाको सामना गर्दैछ । सुपर फोरको पहिलो खेलमा नेपालले आज श्रीलंकासँग प्रतिस्पर्धा गर्न लागेको हो । 

मलेसियाको क्वालालम्पुरस्थिति बायुमास ओभल क्रिकेट मैदानमा हुने खेल नेपाली समय अनुसार पौने १२ बजेबाट सुरु हुनेछ । समूह ‘ए’ बाट नेपाल र भारत अपराजित रहँदै एसिया कपको सुपर फोरमा पुगेको हो । समूह ‘बी’बाट भने बंगलादेश विजेता र श्रीलंकाले उपविजेता बनेर शीर्ष चारमा स्थान बनाएको थियो ।

सुपर फोरको दोस्रो खेलमा नेपालले भोलि शुक्रबार बंगलादेशसँग खेल्नेछ । नेपालले आफ्नो पहिलो खेलमा भने पाकिस्तानलाई ६ विकेटले हराएको थियो । 

पाकिस्तानलाई पराजित गर्दै मनोबल उच्च बनाएको नेपालले श्रीलंकाविरुद्ध सुपर फोरमा पनि उत्कृष्ट प्रदर्शन गर्ने लक्ष्य राखेको छ । भारतविरुद्धको दोस्रो खेल भने वर्षाका कारण प्रभावित हुँदा नेपालले अंक बाँडेको थियो ।