म्यानचेस्टर सिटीले एफए कप फुटबलमा साल्फोर्ड सिटीविरुद्ध शानदार जित निकालेको छ । घरेलु मैदान इतिहाद स्टेडियममा गएराति भएको खेलमा सिटीले पाहुना टोली साल्फोर्डलाई सजिलै ८–० गोलको फराकिलो अन्तरमा पराजित गरेको हो । 

यो हारसँगै साल्फोर्ड प्रतियोगिताबाट बाहिरिएको भएको छ । सिटीको जितमा जेम्स म्याकटीले ह्याट्रिक गरे । म्याकटीले खेलको ६२ औं, ७२ औं र ८१ औं मिनेटमा गोल गर्दै ह्याट्रिक पूरा गरेका थिए । 

यस्तै, जेरेमी डोकुले २ गोल गर्दा युवा स्ट्राइकर डिभिन मुबामानि, निको ओरेली र ज्याक ग्रिलिशको नाममा एक–एक गोल रह्यो ।

यस्तै, एफए कपको अन्य खेलमा लिभरपुलले पनि एक्रिङटन स्टानलीलाई ४–० गोलले पराजित गर्‍यो । चेल्सीले मोरेकम्बमाथि ५–० को जित निकाल्दा इंग्लिस प्रिमियर लिग क्लबमध्ये हार बहोर्ने ब्रेन्टफोर्ड मात्र एक्लो टिम रह्यो । ब्रेन्टफोर्डलाई प्लेमाउथले १–० गोलले हराएको हो । यस्तै, ब्राइटनले नरविच सिटीलाई ४–० र बर्नमाउथले वेस्ट ब्रुमलाई ५–१ गोलले पराजित गरेको छ ।