क्रोएसियाली टोली डायनामो जाग्रेबलाई पराजित गर्दै आर्सनल च्याम्पियन्स लिग फुटबलको अन्तिम १६ मा प्रवेश गरेको छ । घरेलु मैदान एमिरेट्स स्टेडियममा गएराति भएको खेलमा पाहुना टोली डायनामो जाग्रेबलाई ३–० गोलले हराउँदै आर्सनलले लिगको अन्तिम १६ मा स्थान सुरक्षित गरेको हो । 

घरेलु टोलीले खेलको दोस्रो मिनेटमा डेक्लान राइसको गोलबाट अग्रता लिएको थियो । खेलको ६६ औं मिनेटमा काई हाभट्र्जले अर्को गोल गर्दै आर्सनलको अग्रता दोब्बर पारे । कप्तान मार्टिन ओडेगार्डले ९१ औं मिनेटमा अर्को गोल गर्दै आर्सनलको जित सुनिश्चित गरे । 

जाग्रेबले राम्रो प्रदर्शन गरेपनि गोल गर्न भने सकेन । यो जितसँगै आर्सनल ७ खेलबाट १६ अंकसहित लिगको तेस्रो स्थानमा उक्लिएको छ । जाग्रेब भने समान ७ मध्ये दुई खेलमा मात्र विजयी भएको छ । तालिकाको २६ औं स्थानमा रहेको जाग्रेबको ८ अंक छ ।

लिगको अन्य खेलमा इन्टर मिलानले स्पार्टक प्रागलाई १–०, पेरिस सेन्ट जर्मेनले म्यानचेस्टर सिटीलाई ४–२ ले स्तब्ध पार्‍यो । यस्तै, बायर्न म्युनिक पनि फायनउडको हातबाट ३–० ले पराजित रह्यो । 

अन्य खेलमा आरबी लायपजिगले स्पोर्टिङ लिस्वनलाई २–१, साख्तर डोनेस्कले ब्रेस्टलाई २–०, एसी मिलानले जिरोनालाई १–० र सेल्टिकले योङ ब्वाइजलाई १–० गोलले हरायो ।