काठमाडौंको तीनकुने क्षेत्रमा गत चैत १५ गते राजावादी समूहको हिंसात्मक घटनाका कमाण्डर भनिएका व्यवसायी दुर्गा प्रसाईँमाथि अनुसन्धानका लागि १२ दिनको म्याद थप भएको छ ।

 प्रहरीले भद्रपुरबाट पक्राउ गरि काठमाडौं ल्याएपश्चात जिल्ला अदालत काठमाडौंमा पेश गरिएकोमा अदालतबाट सो आदेश भएको हो ।  प्रसाईँसँगै पक्राउ परेका उनका अङ्गरक्षक दिपक खड्कामाथि समेत अनुसन्धानका लागि शिशिरराज ढकालको इजलासले १२ दिन म्याद थप गरेको जिल्ला अदालत काठमाडौंका सूचना अधिकारी दीपक कुमार श्रेष्ठले जानकारी दिनुभयो । 

पक्राउ परेका प्रसाईको उपचारको व्यवस्था मिलाउन समेत अदालतले सम्बन्धीत निकायलाई आदेश दिएको श्रेष्ठले बताउनुभयो । राजावादी समूहले गत चैत १५ गते गरेको प्रदर्शनलाई उत्तेजित पार्दै कमाण्डर प्रसाईँ फरार भएका थिए ।

 फरार भएसँगै प्रहरीले खोजिकार्य जारी राखेको समयमा प्रसाईले आफू काठमाडौंमा रहेको भन्दै पहिलो पटक भिडियो सन्देश जारी गरेका थिए भने २ दिन अघि मात्रै पनि आफू नभागेको भन्दै दोस्रो पटक भिडियो सन्देश सार्वजनिक गरेका थिए ।