जाजरकोटमा बसको ठक्करबाट एक पुरुषको मृत्यु भएको छ । बसको ठक्करबाट नलगाड नगरपालिका–१ चिउरीका सुरेश महरको मृत्यु भएको जिल्ला प्रहरी कार्यालयले जनाएको छ । 

भेरी करिडोर सडकखण्ड अन्तर्गत डोल्पाबाट नेपालगञ्ज जाँदै गरेको भे १ ख १३९६ नम्बरको बसले भेरी नगरपालिका–१ रावतगाउँ नजिकै महरलाई ठक्कर दिएको थियो । 

घाइते महरलाई उपचारका लागि जिल्ला अस्पताल ल्याइए पनि उनको मृत्यु भएको जिल्ला प्रहरी कार्यालय जाजरकोटका प्रहरी नायब उपरीक्षक पुरुषोत्तम प्रसाद पाण्डेले बताउनुभयो । 

ठक्कर दिने बस र चालकलाई प्रहरीले नियन्त्रणमा लिएको छ ।