सामूहिक बलात्कारमा परेकी सिरहाकी १७ वर्षिया रिंकु कुमारी सदाय मृत भेटिएको घटनाबारे अनुसन्धान गर्न मधेश प्रदेश प्रहरी कार्यालयले एसएसपीको नेतृत्वमा छानविन समिति खटाएको छ । जनकपुरस्थित मधेश प्रहरी कार्यालयका अनुसार प्रहरी वरिष्ठ उपरीक्षक एसएसपी शान्तिराज कोइरालाको नेतृत्वमा छानविन समिति गठन गरिएको हो । छानविन समितिले अनुसन्धानसमेत थालिसकेको मधेश प्रदेश प्रहरी कार्यालयलाई उद्धृत गर्दै हाम्रा सहकर्मीले जनाएका छन् । गत माघ १० गते सिरहाको नवराजपुर गाउँपालिका–१ भगवतीपुर टोलकी रिंकु सदाय आफनै घरमा मृत फेला परेकी थिइन् । रातको समयमा शौच गर्न घर बाहिर निस्कदा उनी सामुहिक बलात्कारको शिकार भएकी थिइन् । सो घटनालाई पञ्चायती बसेर ढाकछोप गर्ने प्रयास गरिएको थियो । 

यसैबिच सिरहाको नवराजपुर गाउँपालिका–१ भगवतीपुरकी १७ वर्षीया किशोरी रिंकुकुमारी सदाको सामूहिक बलात्कार र शंकास्पद मृत्यु घटनामा दलित महिला संघले ध्यानाकर्षण भएको जनाएको छ । संघले आज एक विज्ञप्ति जारी गर्दै घटनाप्रति दुःख व्यक्त गरेको हो । जनप्रतिनिधि लगायतले यस्तो जघन्य अपराध घटनामा पञ्चायती गरेर गाउँमै घटना दबाउन खोजेर र प्रहरीले पीडितलाई दबाब दिएर मुद्दा कमजोर बनाउन खोजेर कानुनी व्यवस्थाकै खिल्ली उडाएको संघले विज्ञप्तिमा उल्लेख गरेको छ । संघकी अध्यक्ष कला स्वर्णकारद्वारा जारी विज्ञप्ति मार्फत् घटनामा संलग्नहरूलाई अविलम्ब पक्राउ गरी कानुनी कारवाहीको दायरामा ल्याउन र पीडित परिवारलाई सुरक्षा, उचित राहत तथा क्षतिपूर्ति दिन पनि माग गरिएको छ ।