माओवादी केन्द्रका अध्यक्ष पुष्पकमल दाहालले पूर्वराष्ट्रपति विद्यादेवी भण्डारीलाई सक्रिय राजनीतिमा फर्किने बाटो आफूले खोलिदिएको दाबी गर्नु भएको छ ।

 उहाँले पूर्वउपराष्ट्रपति नन्दबहादुर पुन पासाङलाई आफूले राजनीतिमा ल्याएपछि भण्डारीलाई पनि राजनीतिमा आउने बाटो खुलेको उल्लेख गर्नुभयो । आज विहान विराटनगर विमानस्थलमा सञ्चारकर्मीसँग बोल्दै दाहालले पूर्वराष्ट्रपति र उपराष्ट्रपतिलाई सक्रिय राजनीतिमा आउन संविधानले नरोक्ने बताउनुभयो ।

 एमाले अध्यक्ष केपी शर्मा ओलीको सहमतिमै नेकपा एमालेले भण्डारीको पार्टी सदस्यता नवीकरण गरेको दाबी गर्दै दाहालले भण्डारीको चीन भ्रमणपछि भने विवाद देखिएको बताउनुभयो । फरक प्रसंगमा अध्यक्ष दाहालले दुई ठूला दल नेपाली कांग्रेस र एमालेले रुचि नदेखाएकाले संविधान कार्यान्वयनमा समस्या भएको बताउनुभयो । 

संविधान संशोधन गर्ने मुख्य एजेण्डासहित सरकार बनाएका दलहरुबीच नै असमझदारी बढेकाले संविधान संशोधनको मुद्दा अघि बढ्न नसकेको दाहालको भनाइ थियो । उहाँले गठबन्धन सरकारको कामप्रति आम जनतामा आक्रोश र असन्तुष्टि बढ्दै गएको टिप्पणी गर्नुभयो ।