चीनको बेजिङमा आगमी साता उत्तर कोरियाली नेता किम जोङ उन र रुसी राष्ट्रपति भ्लादिमिर पुटिन सैन्य परेडमा सहभागी हुने भएका छन् । आगामी सेप्टेम्बर ३ मा बेइजिङमा आयोजना हुने जापानी अतिक्रमणविरुद्ध चिनियाँ युद्ध तथा फासिस्टवाद विरोधी विश्वयुद्ध विजयको ८०औँ वार्षिकोत्सवको स्मृति कार्यक्रममा आयोजना हुने सैन्य परेडमा नेता किम र राष्ट्रपति पुटिन सहभागी हुने बताइएको छ ।

 विश्वका प्रमुख शक्तिराष्ट्र प्रमुखको सो भ्रमणलाई चीनले ऐतिहासिक हुने बताएको बीबीसीले जनाएको छ । नेता किम पहिलो अन्तर्राष्टियस्तरको बैठकमा सहभागी हुने सो कार्यक्रम भएकाले राष्ट्रपति सि का लागि कुटनीतिक जीत भएको विश्लेषण गरिएको छ । अमेरिकी राष्ट्रपति डोनाल्ड ट्रम्प भने उपस्थित नहुने बताइएको छ । राष्ट्रपति पुटिन र नेता किम सहित अन्य २६ राष्ट्रका प्रमुखले परेडमा भाग लिने अपेक्षा गरिएको छ । 

१९५९ पछि उत्तर कोरियाली नेताले चीनको सैन्य परेडमा भाग लिएको यो नै पहिलो पटक हो। सो कार्यक्रममा चीनले सयौं सैन्य विमान,एन्टी–ड्रोन प्रणाली लगायत नवीनतम हतियार प्रदर्शन गर्ने तयारी गरेको छ । 

कार्यक्रममा दशौं हजार सेनाले ऐतिहासिक तियानमेन स्क्वायरमा मार्च गर्ने बताइएको छ । सी द्वारा अवलोकन गरिने ७० मिनेटको परेडलाई पश्चिमी शक्ति राष्ट्रले नजिकबाट अवलोकन गर्ने अपेक्षा गरिएको अन्तर्राष्ट्रिय संचारमाध्यमले जनाएका छन् । विरलै विदेश यात्रा गर्ने उत्तर कोरियाली नेता किमले रुसी राष्ट्रपति पुटिनसँग मात्र सम्पर्क सिमित भएकाले उनीहरुको उपस्थिती चर्चाको विषय बनेको टिप्पणी गरिएको छ ।