पार्टीको विधान महाधिवेशनको पूर्वसन्ध्यामा एमाले अध्यक्ष एवम् प्रधानमन्त्री केपी शर्मा ओलीले काठमाडौंका स्थानीय नेताहरुसँग गरेको अनौपचारिक सम्वादका क्रममा राखेको धारणा सार्वजनिक भएका छन् ।

प्रधानमन्त्री निवासमा ओलीले हिजो काठमाडौंका नेताहरुसँग सक्रिय राजनीतिमा फर्किने पूर्व राष्ट्रपति विद्या भण्डारीको निर्णय र त्यसले पारेको प्रभाव लगायत विषयमा धारणा राख्नुभएको थियो । त्यसपछि काठमाडौं जिल्ला कमिटीका अध्यक्ष दिपक निरौलाले अध्यक्ष ओलीको धारणा भन्दै केही वूँदा सामाजिक सञ्जालमा सार्वजनिक गर्नुभएको थियो ।

त्यसकै आधारमा केही सञ्चारमाध्यममा समाचार प्रकाशित भएपछि एमालेमा विवाद उत्पन्न भएको देखिन्छ । त्यसपछि प्रधानमन्त्री ओलीको सचिवालयले अनौपचारिक छलफलबारे भ्रामक र मनगढन्ते विषय बाहिर ल्याइएको टिप्पणी गरेको छ । सचिवालयको वक्तव्यसँगै एमाले अध्यक्ष ओलीको भिडियो सामाग्री समेत सार्वजनिक गरिएको छ । सो क्रममा उहाँले पूर्व राष्ट्रपति भण्डारीलाई अध्यक्ष बनाउन नमिल्ने र राजनीतिमा फर्काउने गल्ती गर्न नहुने बताउनुभएको थियो ।

पूर्व राष्ट्रपति भण्डारीसँग अध्यक्ष ओलीको तिक्तता बढिरहेका बेला पार्टीको आन्तरिक छलफलको विषय सार्वजनिक भएको हो । अध्यक्ष ओलीले पार्टीमा भण्डारीले चुनाव जित्न नसक्ने र नेता भीम रावलकै जस्तो अवस्था हुने दाबी गर्नुभयो ।

वरिष्ठ उपाध्यक्ष इश्वर पोखरेल र पूर्व राष्ट्रपति भण्डारी निकट मानिएका एमाले काठमाडौं जिल्ला कमिटीका अध्यक्ष निरौलाले आन्तरिक विषय सार्वजनिक गरेपछि प्रधानमन्त्रीको सचिवालयले त्यसको प्रतिवाद गरेको हो ।