काठमाडौं विश्वविद्यालय अन्तर्गतको शिक्षा प्रणाली कार्यान्वयन प्रयोगशाला (आइल्याव)को दीक्षान्त समारोह सम्पन्न भएको छ । सात वटा प्रदेशबाट गत वर्ष आईल्यावमा सहभागी सदस्यहरुलाई बिहीबार ललितपुरमा एक समारोहका बीच प्रमाणपत्र प्रदान गरिएको हो । बिहीबारको दीक्षान्त समारोह कार्यक्रममा सभामुख देवराज घिमिरेले प्रमाणपत्र हस्तान्तरण गर्दै प्राविधिक व्यावसायिक शिक्षा र तालिम टीभेटले मुलुक विकासमा खेलेको भुमिकाको उजागर गर्नुभयो । मुलुकमा दक्ष जनशक्तिको आवश्यकता टडकारो भएको अवस्थामा आईल्यावबाट उत्पादन हुने जनशक्तिले सो आवश्यता परिपुर्ती केही हदसम्म गरेको सभामुख घिमिरेको भनाई छ । काठमाडौं विश्वविद्यालयका उपकुलपति प्रा. अच्युत प्रसाद वाग्लेले नेपालमा आर्थिक विकासको सकारात्मक पाटो टीभेटको विकास भएको बताउनुभयो । स्थानीयतहसंगको सहकार्यमा नतिजामुखी काम हुनुलाई यसको उपलब्धीका रुपमा मान्न सकिने उपकुलपति वाग्लेको भनाई छ । कार्यक्रममा स्वीजरल्याण्ड सरकारको पूर्व राज्य सचिव उर्सुला रोनाल्डले नेपालको टीभेट क्षेत्रको विकासका लागि धेरै नेतृत्वकर्ताहरु रहेको उल्लेख गर्नुभयो । तर निजी क्षेत्रको पर्याप्त सहभागीता नभएका कारण यस क्षेत्रले आशातित सफलता पाउन नसकेको सचिव रोनाल्डको भनाई छ । यस्तै, विश्वविद्यालयको शिक्षा विभागका डीन प्रा. बालचन्द्र लुईंटेलले विश्वविद्यालयले नेपालको प्राविधिक व्यावसायिक शिक्षा र तालिम क्षेत्रको सुदृढीकरणका लागि महत्पपूर्ण भुमिका खेल्दै आएको बताउनुभयो । कार्यक्रममा शिक्षा विज्ञान तथा प्रविधि मन्त्रालयका टीभेट महाशाखा प्रमुख श्री प्रसाद भट्टराईले सरकारले यो क्षेत्रको सुदृढीकरणका लागि प्राथमिकतामा राखेको बताउनुभयो । यस्तै, स्वीस राजदुतावासकी प्रथम सचिव एन्टोनिया फ्लक्सले आइल्यावले नेपालको प्राविधिक व्यावसायिक शिक्षा र तालिम क्षेत्रमा व्यवहारिक सुधार ल्याएकामा खुशी व्यक्त गर्नुभयो । कार्यक्रममा बढीमालिका नगरपालिकाका मेयर अमर बहादुर खडकाले पाठ्यक्रममा नीतिगत सुधार गरेमा मात्र टीभेट क्षेत्रको विकास गर्न सकिने बताउनुभयो । टिभेटलाई आर्थिक गतिविधिको प्रमुख कडी हो भन्नका लागि बुझ्न र बुझाउन नसकिएको सुनसरीको दुहवी नगरपालिकाका मेयर वेदनारायण गच्छादारको भनाई छ । निजी क्षेत्र र स्थानीयतह सहकार्य गरेर अघि बढ्न पर्छ भन्नेमा उद्योगी माया खनालको भनाई छ । नारायणी बहुप्राविधिक शिक्षालयकी प्रमुख सरिता रेग्मीले निजी क्षेत्रको अर्थपुर्ण सहभागीता सहित पाठ्यक्रमबनाएर कार्यान्वयनमा ल्याउंदा त्यसले प्रभावकारीता पाएको बताउनुभयो । यसैविच, टीभेट क्षेत्रको विकासका लागि राष्ट्रियस्तरमा वेविनार गर्ने, सीप विकासमा जागरुकता गर्ने लगायतका उद्धेश्य सहित सात सदस्यीय आइल्याव फोरम पनि गठन गरिएको छ ।