विद्यालय शिक्षा विधेयकमा आफ्ना माग सम्बोधन नभएको भन्दै दबाब बढाउँदै आएको नेपाल शिक्षक महासंघले आज माओवादी केन्द्रको मुख्यालयमा धर्ना दिएको छ ।

 माग पूरा गराउन विभिन्न दलका केन्द्रीय कार्यालयमा धर्ना दिँदै आएको महासंघले आज पेरिसडाँडा पुगेर माओवादी केन्द्रको कार्यालयमा धर्ना दिएको हो । 

यसअघि उनीहरुले हिजो एमाले पार्टीको केन्द्रीय कार्यालयमा धर्ना दिएका थिए । विद्यालय शिक्षक र कर्मचारीका बाँकी माग सम्बोधन गराउन दबाब स्वरुप दलको केन्द्रीय कार्यालयमा धर्ना दिनुपरेको महासंघका अध्यक्ष लक्ष्मीकिशोर सुवेदीले बताउनुभयो । महासंघले आफ्ना माग सम्बोधन नभई विधेयक संघीय संसद्बाट पारित गराए आन्दोलनलाई थप सशक्त बनाउने चेतावनी दिँदै आएको छ ।