दाङमा गाडी दुर्घटना हुँदा दुई जनाको मृत्यु भएको छ । दुर्घटनामा शिवराज नगरपालिका–३ का ४२ वर्षीया प्रिथी थारु र ६० वर्षीया फुलसी थारुको मृत्यु भएको जिल्ला प्रहरी कार्यालयका प्रहरी नायब उपरीक्षक ईश्वर थापाले जानकारी दिनुभयो । 

कपिलवस्तुको चद्रौटाबाट बर्दियातर्फ जाँदै गरेको लु १ ज ४२९८ नम्बरको गाडी लमही नगरपालिका–९ च्याउखोला बक्सकटिङ नजिकै दुर्घटना भएको हो । 

घाइते १२ जनाको लमही अस्पतालमा उपचार भइरहेको जिल्ला प्रहरी कार्यालयले जनाएको छ । प्रहरीका अनुसार गाडीमा १४ जना सवार रहेका थिए । तीव्र गतिका कारण गाडी दुर्घटनामा परेको हुनसक्ने प्रहरी नायब उपरीक्षक थापाको भनाई छ ।