नेपाली राष्ट्रिय फुटबल टोलीले ताजकिस्तानको राष्ट्रिय टिमसँग आज मैत्रीपूर्ण फुटबल खेल्दैछ । ताजकिस्तानको सेन्ट्रल रिपब्लिकन मैदानमा हुने नेपाल र घरेलु टोलीबीचको खेल नेपाली समय अनुसार साँझ पौने ७ बजे सुरु हुनेछ । 

नेपाल, ताजकिस्तान र अफगानिस्तान सम्मिलित प्रतियोगिताका लागि नेपाल टोली कात्तिक २५ गते त्यसतर्फ प्रस्थान गरेको थियो । करीब दुई साताको तयारीपछि नेपाली टोली ताजकिस्तानको राजधानीमा हुने दुई मैत्रीपूर्ण खेलका लागि गएको हो । 

नेपालका मुख्य प्रशिक्षक नवीन न्यौपानेले घरेलु टोली ताजकिस्तानविरुद्धको खेलका लागि नयाँ चार खेलाडी समावेश गर्दै २३ सदस्यीय टिम छनोट गरेका थिए । टोलीमा अनुभवीमा कप्तान किरण चेम्जोङ, डिफेन्डर रोहित चन्द, फरवार्ड अञ्जन विष्ट पनि रहेको छ । 

विगतमा नेपालले ताजकिस्तानविरुद्ध खेलेका तीन वटै खेलमा हार बेहोरेको थियो । ताजकिस्तानविरुद्धको खेलपछि नेपालले शनिबार अफगानिस्तानको सामना गर्नेछ ।