नेपाल क्रिकेट संघले आईसीसी यू–१९ महिला टी–ट्वेन्टी विश्वकपमा छनोट भएका राष्ट्रिय टिमका खेलाडीहरुलाई नगदसहित सम्मान गर्ने भएको छ । क्यानले टोलीका प्रत्यके खेलाडीलाई जनही २ लाख ५० हजार रुपैयाँ दिने जनाएको हो ।

यस्तै, क्यानले टिम अफिसियलहरुलाई जनही १ लाख ५० हजार रुपैयाँ प्रदान गर्नेछ । हिजो युएईमा भएको एसिया छनोटमा घरेलु टोलीलाई पछि पार्दै नेपाली टोली विश्वकपका लागि छनोट भएको हो ।

अब नेपालले आगामी जनावरी–फेब्रुअरीमा मलेसियामा हुने विश्वकप खेल्नेछ । 

सो प्रतियोगिताको समूह ’डी’ मा नेपालसँगै अस्ट्रेलिया, बंगलादेश र स्कटल्यान्ड छन् । विश्वकपमा चार समूहका १६ टोली समूह चरणमा भिड्नेछन् । 

समूहका शीर्ष दुई टोली अन्तिम आठमा पुग्नेछन् ।

विश्वकपमा छनोट भएसँगै नेपाली यू–१९ टोलीले एसिया कप समेत खेल्ने भएको छ । एसिया कप आगामी डिसेम्बर १५ देखि २२ सम्म मलेसियामै आयोजना हुनेछ ।

सो प्रतियोगिताको समूह ‘बी’ मा नेपालसँगै भारत र पाकिस्तान छन् । यस्तै, समूह ‘ए’ मा श्रीलंका, मलेसिया र बंगलादेश छन् । यू–१९ महिला एसिया कप एसिसीले पहिलो पटक आयोजना गर्न लागेको हो ।