पाँचथरमा जारी फाल्गुनन्द गोल्डकप फुटबल प्रतियोगिताको क्वाटरफाइनल चरणका खेल आजबाट सुरु हुँदैछ । प्रतियोगिताको पहिलो क्वाटरफाइनलमा विभागीय टोली त्रिभुवन आर्मी र आयोजक फिदिम स्पोर्टिङ क्लबबीच प्रतिस्पर्धा हुनेछ । 

फिदिम बजारस्थित फिदिम माविको मैदानमा खेल दिउँसो २ बजे सुरु हुनेछ । यसअघि हिजो भएको खेलमा काठमाडौंको मच्छिन्द्र फुटबल क्लबले झापा–११ लाई ५–० गोलले पराजित गर्दै क्वाटरफाइनल प्रवेश गरेको थियो । प्रतियोगितामा नेपाल र भारतका गरी १० वटा क्लबको सहभागिता रहेको छ ।

सहभागी मध्ये भारतको करसाङ फुटबल क्लब र झापा–११ पहिलो चरणबाटै बाहिरिएका छन् । प्रतियोगिताको फाइनल खेल पुस १५ गते हुनेछ । जिल्लाको सर्वाधिक पुरस्कार राशि रहेको फाल्गुनन्द गोल्डकपमा यस वर्ष विजेताले १० लाख ५ सय ५५ रुपैयाँ र उपविजेताले ५ लाख ५ सय ५५ रुपैयाँ प्राप्त गर्नेछन् । 

यस्तै प्रत्येक खेलका म्यान अफ दी म्याचलाई १० हजार रुपैयाँका दरले पुरस्कार दिइने आयोजकले जनाएको छ । सर्वाधिक गोलकर्तालाई १५ हजार र विभिन्न विधाका उत्कृष्टलाई १० हजारका दरले पुरष्कृत गरिने आयोजक क्लबले जानकारी दिएको छ ।