चर्च ब्वाइज युनाइटेडले पाँचथरमा आयोजित फाल्गुनन्द गोल्डकप फुटबल प्रतियोगिताको ११ औं संस्करणको उपाधि जितेको छ ।

फाइनलमा आज मच्छिन्द्र फुटबल क्लबलाई टाइब्रेकरमा पराजित गर्दै चर्च ब्वाइज च्याम्पियन बनेको हो । यसअघि झापा कपको विजेता र इलाम गोल्डकपको उपविजेता बनेको चर्च ब्वाइजले मच्छिन्द्रलाई टाइब्रेकरमा ५–४ गोलले हरायो ।

निर्धारित र अतिरिक्त समयसम्म २–२ गोलको बराबरी भएपछि खेलको निर्णय टाईब्रेकरबाट गरिएको हो । जितपछि चर्च ब्वाइजले उपाधिसँगै १० लाख ५ सय ५५ रुपैयाँ प्राप्त गरेको छ ।

उपविजेता मच्छिन्द्रले ५ लाख ५ सय ५५ रुपैयाँ प्राप्त गरेको छ । पुष ६ गतेबाट सुरु भएको प्रतियोगितामा नेपाल र भारतका गरी १० टिमको सहभागिता थियो ।