टोटनहमले लिग कप फुटबलको सेमिफाइनलको पहिलो लेगमा लिभरपुललाई पराजित गरेको छ । टोटेनहम हटस्पर स्टेडियममा गएराति भएको खेलमा घरेलु टोलीले लिभरपुललाई १–० गोलले हराएको हो । 

टोटेनहमको जितमा खेलको ८६ औं मिनेटमा लुकास बेरगभालले गरेको एक मात्र गोल निर्णायक बन्यो । यस सिजन आर्ने स्लटको लिभरपुलको यो दोस्रो हार हो । 

लिभरपुल सबै खाले प्रतियोगिताका २४ खेलयता पहिलो पटक पराजित भएको हो । यो नतिजासँगै टोटनहमलाई एक गोलको झिनो अग्रता प्राप्त भएको छ ।

लिग कप फुटबलको सेमिफाइनलको दोस्रो लेग आगामी फेब्रवरी ६ मा लिभरपुलको घरेलु मैदान एनफिल्ड स्टेडियममा हुनेछ । 

यो खेल अगाडि टोटनहमका १० प्रमुख खेलाडी चोट अथवा विरामीका कारण उपलब्ध थिएनन् । यही खेलका क्रममा रोड्रिगो बेटानकुर पनि चोट बोक्दै मैदानमा ढलेका थिए ।