थ्री स्टार क्लब आहा–रारा पोखरा गोल्डकप फुटबल प्रतियोगिताको सेमिफाइनलमा प्रवेश गरेको छ । दोस्रो क्वाटरफाइनलमा आज मच्छिन्द्र फुटबल क्लबलाई टाइब्रेकरमा ४–२ गोलले पराजित गर्दै थ्री स्टारले अन्तिम चारमा स्थान सुरक्षित गरेको हो । 

पोखरा रंगशालामा भएको खेलको निर्धारित र अतिरिक्त समय गोलरहित बराबरीमा सकिएपछि खेलको निर्णय टाइब्रेकरबाट गरिएको हो ।

 पाँच पटकको विजेता थ्री स्टारले अब सेमिफाइनलमा दुई विदेशी टोली उज्वेकिस्तानको ब्ल्याक बुल्स एफसी र भारतको थन्डर बोल्ड नर्थ युनाइटेड फुटबल क्लबबीचको विजेतासँग प्रतिस्पर्धा गर्नेछ । तेस्रो क्वाटरफाइनलमा भोलि त्रिभुवन आर्मी क्लब र चर्च ब्वाइज युनाइटेडबीच प्रतिस्पर्धा हुनेछ ।