मकवानपुर जिल्ला खेलकुद विकास समितिको आयोजनामा भएको १५ औं संस्करणको जिल्लास्तरीय राष्ट्रपति रनिङ्ग शिल्डको उपाधि हेटौंडा उपमहानगरपालिकाको टिमले जितेको छ । 

आइतबारबाट सुरु भएर मंगलबार अपराह्न सम्पन्न भएको जिल्लास्तरीय राष्ट्रपति रनिङ्ग शिल्ड प्रतियोगिताको उपाधि हेटौंडाले चुमेको हो । हेटौंडाले १५ स्वर्ण, १० रजत र ९ कांस्य पदक प्राप्त गरेको छ । 

यसैगरी १३ स्वर्ण, ५ रजत र १० कांस्य पदक प्राप्त गर्दै बकैया गाउँपालिका द्वितीय भएको छ भने तृतीय भएको थाहा नगरपालिकाले ११ स्वर्ण, ९ रजत र ६ कांस्य पदक प्राप्त गरेको छ । बागमती गाउँपालिकाको टिमले ६ स्वर्ण, १७ रजत र १७ कास्य पदक प्राप्त गरेको छ ।

प्रतियोगितामा मकवानपुरको ९ वटा पालिकाबाट विभिन्न विधाका करीब ६ सय जना खेलाडीहरुको सहभागिता रहेको थियो । राष्ट्रपति रनिङ्ग शिल्ड प्रतियोगिता अन्तर्गत भलिबल, एथ्लेटिक्स, कराते, तेक्वान्दो कबड्डी लगायतका खेलहरु सञ्चालन भएको थियो । इन्द्रसरोवर गाउँपालिका प्रतियोगितामा सहभागी भएको थिएन ।

प्रतियोगितामा प्रथम, द्वितीय र तृतीय हुनेहरुलाई क्रमशः स्वर्ण, रजत र कांस्य पदकसहित प्रमाणपत्र प्रदान गरिएको छ । गत वर्ष सम्पन्न भएको १४ औँ संस्करणको मकवानपुर जिल्लास्तरीय राष्ट्रपति रनिङ शिल्ड प्रतियोगितामा पनि हेटौंडा प्रथम भएको थियो । 

विजेता, उपविजेताहरुलाई हेटौंडा उपमहानगरपालिकाकी प्रमुख मीनाकुमारी लामा लगायत शिल्ड, मेडल एव पुरस्कार र प्रमाणपत्र वितरण गर्नु भएको थियो ।