आयोजक नव जनजागृति युवा क्लब बारामा १५ औं जितपुर सिमरा गोल्डकप फुटबल प्रतियोगिताको सेमिफाइनलमा प्रवेश गरेको छ । मोहित गुरुङको निर्णायक गोलको मद्दतमा नव जनजागृतिले अन्तिम चारमा स्थान सुरक्षित गरेको हो । 

सिमरास्थित मैदानमा शनिबार साँझ भएको खेलमा नव जनजागृतिले मकवानपुर जिल्ला फुटबल संघलाई १–० गोलले पराजित गर्‍यो । मोहितले ८५ औं मिनटमा गोल गर्न सफल भएका थिए । 

कर्नर एरियाबाट मोहितले प्रहार गरेको बल सिधै गोलमा परिणत भएको थियो । हेटौंडाका गोल रक्षक टोपबहादुर रानाले बचाउको लागि कुनै चाल नै पाएनन् । दर्शकको समर्थन पाएको आयोजक सिमराले आकर्षक अवसरहरु बनाए पनि मकवानपुरको एन्फाविरुद्ध जित निकाल्न अन्तिमसम्मै संघर्ष गर्नु परेको थियो । 

पहिलो हाफमा मकवानपुरले आयोजकविरुद्ध सुरुवाती अग्रता बनाउने सुन्दर अवसर गुमाएको थियो । खेलको म्यान अफ दी म्याच आयोजक सिमराका मोहित गुरुङ भए । उनले नगद १० हजार रुपैयाँ र ट्रफी प्राप्त गरे । 

उनलाई ओमनी मोटर्सका दिलिप हमाल र ग्रिन इनर्जीका शैलेश साहले ट्रफी प्रदान गरे । आइतबार साविक विजेता नेपाल पुलिस क्लब र मच्छिन्द्र फुटबल क्लबबीच प्रतिस्पर्धा हुनेछ ।