राष्ट्रसंघले म्यानमारमा मनसुन शुरु हुनुपूर्व नै भुकम्पपीडितलाई सहायता बढाउन आग्रह गरेको छ । म्यानमारमा गएको पछिल्लो भुकम्पमा परि मृत्यु हुनेको संख्या २ हजार ७ सय १९ पुगेको छ । भवन, सडक र पुलहरूमा व्यापक क्षति भएपछि पिउने पानी, सरसफाइ, खाना, आश्रय र औषधिको आवश्यक रहेको राष्ट्र संघका अधिकारीहरुले बताएका छन् । राष्ट्र संघका प्रवक्ता स्टेफेन डुजारिकले मनसुन मौसम अघि राहत प्रदान गर्न द्रुत गतिमा काम गर्नुपर्नेमा जोड दिनु भएको छ ।

भूकम्पअघि म्यानमारमा गृहयुद्धका कारण ३० लाख बढी मानिसहरू विस्थापित भएका छन् । म्यानमारका लागि राष्ट्रसंघका विशेष दूत जूली बिशपले सबै पक्षलाई तत्काल गोली बारुद बन्द गर्न, मानवीय पहुँचलाई अनुमति दिन र सहायताकर्मीलाई सुरक्षाको प्रत्याभूति सुनिश्चित गर्न आग्रह गर्नु भएको छ । शुक्रबार बिहान गएको ७ दशमलव ७ म्याग्निच्युडको भूकम्पमा परि ४ हजार ५ सय २१ जना घाइते भएका छन् भने ४ सय ४१ जना अझै बेपत्ता छन् । छिमेकी थाइल्याण्डमा भूकम्पबाट मृत्यु हुनेको संख्या २१ पुगेको छ । त्यहाँ पनि सयौं भवनहरू क्षतिग्रस्त भएका छन् ।