अमेरिकी राष्ट्रपति डोनाल्ड ट्रम्पको कर सम्बन्धी नयाँ नीतिप्रति रुष्ट चीनले अमेरिकी सामानमा ३४ प्रतिशत कर लगाउने घोषणा गरेसँगै अमेरिकी सेयर बजार प्रभावित भएको छ । शुक्रबार अमेरिकाको सेयर बजार ५ प्रतिशत भन्दा बढीले गिरावट आएको बीबीसीले जनाएको छ । पछिल्लो गिरावट अमेरिकी शेयर बजारका लागि सन् २०२० पछिको सबैभन्दा खराब अवस्था हो । चीनले अमेरिकी कर वृद्धिको प्रतिक्रिया स्वरुप अमेरिकी सामानमा ३४ प्रतिशतसम्म कर घोषणा गरेसँगै विस्तारित व्यापार युद्ध र विश्वव्यापी अर्थतन्त्रमा नोक्सान हुने सम्भावना बढ्दै गएको विश्लेषण भएका छन् ।

चीनको पछिल्लो कदमको असर बेलायतमा पनि परेको छ । बेलायतको शेयर बजारमा पनि ५ वर्ष यताकै सबैभन्दा ठूलो गिरावट देखिएको छ । यस्तै जर्मनी र फ्रान्सको पनि शेयर बजारमा गिरावट आएको अन्तराष्ट्रिय सञ्चारमाध्यमहरुले जनाएका छन् ।

ट्रम्पले हरेक मुलुकका सामानमा न्यूनतम १० प्रतिशत नयाँ आयात कर लगाउने घोषणा गरेपछि विश्व स्टक बजारले चीन, युरोपेली संघ र भियतनाम जस्ता प्रमुख व्यापारिक साझेदारहरू लगायत दर्जनौं देशका उत्पादनहरुमा घाटा लागेको छ । सन् १९६८ पछि अमेरिकामा उच्च दरमा कर बृद्धि भएको थिएन ।