राष्ट्रिय प्रजातन्त्र पार्टी राप्रपाले राजावादी आन्दोलनको सन्दर्भमा प्रधानमन्त्री एवम् एमाले अध्यक्ष केपी ओलीको अभिव्यक्तिप्रति आपत्ति जनाउँदै संसदमा जवाफ माग्ने निर्णय गरेको छ । सो पार्टीको संसदीय दलको बैठकले प्रधानमन्त्रीको अभिव्यक्ति हिंसा भड्काउने चाहनाबाट आएको भन्दै जवाफ माग्ने निर्णय गरेको हो । बैठकपछि बोल्दै राप्रपाका प्रमुख सचेतक ज्ञानेन्द्र शाहीले प्रधानमन्त्री ओलीको अभिव्यक्ति कानून विपरित भएको बताउनुभयो ।

यसैबीच, संयुक्त जनआन्दोलन समितिले जेठ १५ गतेबाट शुरु हुने आन्दोलन शान्तिपूर्ण हुने बताएको छ । समितिमा आवद्ध दलका नेताहरुले काठमाडौंमा आज सञ्चारकर्मीसँग कुरा गर्दै आन्दोलनलाई शान्तिपूर्ण बनाउने प्रतिवद्धता जनाएका हुन् । सो अवसरमा बोल्दै राप्रपा नेपालका अध्यक्ष कमल थापाले ह्दयेन्द्र शाहलाई राजा बनाउन सबै पक्षबीच सहमति हुन सक्ने बताउनुभएको छ ।

राप्रपा, राप्रपा नेपालसहितका दल र समूहको सहभागितामा राजसंस्था र हिन्दू राष्ट्रको पक्षमा जेठ १५ गते अर्को चरणको आन्दोलन गर्न लागिएको हो ।