तनहुँको मानपुरमा बस दुर्घटना हुँदा २ को मृत्यु, २३ घाइते
पुस २५, २०७६ | तनहुँ
तनहुँको घिरिङ गाउँपालिका ३ मानपुर नजिक अर्चलकोटमा शुक्रबार बस दुर्घटना हुँदा २ जनाको मृत्यु भएको छ । २३ जना घाइते भएका छन् ।
दुर्घटनामा परी घिरिङ गाउँपालिका १ बैडीकी २० वर्षीया मिना थापाको घटनास्थलमै मृत्यु भएको प्रहरीले जनाएको छ ।
सोही गाउँपालिकाको वडा नम्बर ३ की ४२ वर्षीया नानीमाया गुरुङ्गको पोखराको फिस्टेल अस्पतालमा उपचारका क्रममा मृत्यु भएको इलाका प्रहरी कार्यालयका प्रहरी नायब निरीक्षक भेषराज रेग्मीले बताउनुभयो ।
घाइते ३ जना यात्रुको अवस्था चिन्ताजनक छ । गम्भीर घाइतेहरुको पोखराका अस्पतालमा उपचार भईरहेको छ ।
अन्य घाइतेको भने भिमादका स्वास्थ्य क्लिनिकहरुमा उपचार भइरहेको प्रहरीले जनाएको छ ।
पाल्पाको रामपुरबाट भिमाद आउँदै गरेको ग १ ख ६१७५ नम्बरको यात्रुबस तीब्र गतिका कारण दुर्घटना भएको प्रहरीले जनाएको छ ।
