पहिलो संस्करणको नेपाल कबड्डी लिगको उपाधिका लागि काठमाडौं माभरिक्स र जनकपुर नाईट्स बीच प्रतिस्पर्धा हुने भएको छ । त्रिपुरेश्वरस्थित दशरथ रंगशालाको कभर्डहलमा हुने फाइनल खेल आज साँझ साढे ६ बजे सुरु हुनेछ । 

यसअघि हिजो भएको प्रि–फाइनल म्याच कन्फ्रेन्समा दुवै टोलीले फाइनलका लागि तयार रहेको बताएका छन् । काठमाडौं त्यही टिम हो, जसले पूरा प्रतियोगितामा जनकपुरलाई शतप्रतिशत जितबाट रोकेको थियो । 

लिग चरणमा काठमाडौंले जनकपुरलाई ३९–३९ स्कोरको बराबरीमा रोकेर अंक खोसेको थियो । जनकपुरले लिगका चारै खेल जितेर शीर्ष स्थान हासिल गरेको थियो ।

काठमाडौं ३ जित, १ बराबरी र १ हारसँगै तेस्रो भएको थियो । जनकपुरले पहिलो क्वालिफायरमा विराटनगर ब्यान्डिट्सलाई हराएर फाइनलमा स्थान बनाएको हो । काठमाडौंले इलिमिनेटरमा धनगढी वाइल्डक्याट्सको चुनौती पन्छाएको थियो । 

दोस्रो क्वालिफायरमा विराटनगरलाई हराएर काठमाडौंले उपाधि यात्रा तय गरेको हो । लिगमा ६ शहर काठमाडौं, पोखरा, विराटनगर, जनकपुर, धनगढी, बुटवलको नामबाट फ्रेन्चाइज टोली सहभागी भएको थियो ।