आगामी शुक्रवार ललितपुरमा शुरु हुने एमालेको दोस्रो विधान महाधिवेशनमा २ हजार ३ सय भन्दा बढी प्रतिनिधि सहभागी हुने भएका छन् ।

 महाधिवेशनमा २ हजार २६ जना प्रतिनिधि र आयोजकका हैसियतमा ३ सय १५ जना गरी २ हजार ३ सय ४१ प्रतिनिधि सहभागी हुने छन् । यसैबीच, महाधिवेशनको तयारी पुरा भएको एमालेले जनाएको छ । आज आयोजित पत्रकार सम्मेलनमा एमाले प्रचार विभाग प्रमुख राजेन्द्र गौतमले महाधिवेशनको तयारी सकिएको जानकारी दिनुभयो ।

 विधान महाधिवेशनमा अध्यक्ष केपी ओलीले राजनीतिक प्रतिवेदन, उपाध्यक्ष विष्णुप्रसाद पौडेलले विधान संशोधनसम्बन्धी प्रस्ताव र महासचिव शंकर पोखरेलले सङ्गठनात्मक प्रस्ताव पेस गर्ने तय भएको छ । यसैबीच, एमाले महासचिव पोखरेलले विधान महाधिवेशनमा पूर्व राष्ट्रपति विद्या भण्डारीको पार्टी सदस्यताबारे छलफल नहुने बताउनुभएको छ ।

 सो विषयमा केही नेताले राखेको फरक मत विधान महाधिवेशनमा प्रवेश हुन नसक्ने उहाँको भनाइ थियो । पार्टीको सचिवालय बैठकले फरक मतको विषयमा निर्णय गर्ने पोखरेलले बताउनुभयो ।

विधान महाधिवेशन लगायत विषयमा छलफल गर्न एमालेले भोलि सचिवालय बैठक बोलाएको छ । एमालेले ७० बर्षको उमेर हद र दुई कार्यकालको व्यवस्था हटाइसकेको छ ।