पर्सामा झाडापखाला र हैजाका बिरामीको संख्या ७ सय भन्दा बढी पुगेको छ । तीमध्ये ५ सय १७ बिरामी निको भएर डिस्चार्ज भई घर फर्किसकेका छन् ।

वीरगन्ज महानगरपालिका र पोखरिया नगरपालिकाका अस्पताल र स्वास्थ्य संस्थाहरुमा १ सय ९५ जना बिरामीको उपचार भइरहेको छ । स्वास्थ्य कार्यालय पर्साले आज सार्वजनिक गरेको तथ्याङ्क अनुसार हालै मात्र ७७ नयाँ बिरामी सम्पर्कमा आएका छन् ।

सो कार्यालयले स्थानीय तह, संघीय स्वास्थ्य तथा जनसंख्या मन्त्रालय, मधेस प्रदेश स्वास्थ्य निर्देशनालय, इपिडिमियोलोजि तथा रोग नियन्त्रण महाशाखा लगायतका निकायसँग समन्वय गरी नियन्त्रणका प्रयास जारी राखिएको बताएको छ ।

प्रकोपको कारण पत्ता लगाउन पानीका नमुना सेन्ट्रल ल्याबमा पठाइएको छ । गत साउन २८ देखि वीरगन्जका अस्पतालमा झाडापखालाका बिरामी देखिन थालेका थिए । त्यस्तै, गत भदौ ५ गते पहिलो पटक हैजाको संक्रमण पुष्टि भएको थियो ।