नेपाली राष्ट्रिय फुटबल टोलीले अफगानिस्तानको राष्ट्रिय टिमसँग आज मैत्रीपूर्ण फुटबल खेल्दैछ । ताजकिस्तानको सेन्ट्रल रिपब्लिकन मैदानमा हुने नेपाल र अफगानिस्तान बीचको खेल नेपाली समय अनुसार साँझ पौने ७ बजे सुरु हुनेछ । 

फिफा विन्डो अन्तर्गत त्रिदेशीय अन्तर्राष्ट्रिय मैत्रीपूर्ण फुटबलको दोस्रो खेलमा नेपालले अफगानिस्तानसँग खेल्न लागेको हो । अफगानिस्तानसँग नेपालको ११ वर्षपछि भेट हुँदैछ । 

सन् २०१३ मा काठमाडौंमा भएको साफ च्याम्पियनसिपमा नेपाल र अफगानिस्तानबीच प्रतिस्पर्धा भएको थियो । सो खेलमा अफगानिस्तान १–० ले विजयी भएको थियो । 

सन् २००६ देखि नेपाल र अफगानिस्तानबीच ६ खेलमा प्रतिस्पर्धा भएको छ । त्यसमा नेपालले ३ र अफगानिस्तानले २ पटक जितेका थिए । एक खेल बराबरीमा टुंगिएको थियो । 

त्रिदेशीय अन्तर्राष्ट्रिय मैत्रीपूर्ण फुटबलको आफ्नो पहिलो खेलमा नेपालले घरेलु टोली ताजकिस्तानसँग ४–० गोलले पराजित भएको थियो ।