इंग्ल्याण्डका भेट्रान अलराउण्डर रवि बोपाराले चितवन राइनोजबाट नेपाल प्रिमियर लिग क्रिकेट खेल्ने भएका छन् ।

चितवनले सामाजिक सञ्जाल मार्फत उनलाई अनुबन्धित गरेको जनाएको हो । कुशल मल्ल मार्की खेलाडी रहेको चितवनले पाँचौं विदेशी खेलाडीको रुपमा बोपारालाई अनुबन्ध गरेको हो ।

३९ वर्षीय बोपाराले ३८ टी–२० आई खेलको ३५ इनिङमा १ शतक र १४ अर्धशतकसहित ७ सय ११ रन बनाउँदा २१ इनिङ्समा १६ विकेट लिएका छन् । आईपीएलसहित विश्व भरका लिगमा प्रभावशाली प्रदर्शन गरेका बोपाराले समग्रमा ४ सय ७८ टी–ट्वेन्टी खेलमा ९ हजार ४ सय ४८ रन तथा २ सय ९१ विकेट लिएका छन् ।

इंग्ल्याण्डका लागि १ सय २० ओडीआईमा २ हजार ६ सय ९५ रन र ४० विकेट लिएका बोपाराले १३ टेस्ट पनि खेलेका छन् । यसअघि, चितवनले विदेशी खेलाडीका रुपमा दक्षिण अफ्रिकाका मार्चन्ट डे लांग, इंग्ल्याण्डका ल्यूक मार्टिन बेनकेन्स्टाइन, अफगानिस्तानका हसन इसाखिल र नामिबियाका जान निकोल लफ्टी इटनलाई अनुबन्धित गरिसकेको छ ।

टिमको मुख्य प्रशिक्षकमा भारतका उमेश पटवाल रहेका छन् । ८ टिमको सहभागिता रहेको एनपीएल मंसिर १५ गतेदेखि सुरु हुने छ ।