प्रधानमन्त्री केपी शर्मा ओली आज देखि ५ दिनका लागि चीन भ्रमणमा जानुभएको छ । चीनका राष्ट्रपति सी चिन पिङको निमन्त्रणा प्रधानमन्त्री ओली चीन जानुभएको हो । तियानजिनमा हुने सांघाई सहयोग संगठन (एससीओ)को शिखर सम्मेलनमा सहभागी हुन उहाँ आज बिहान ७ बजे चीन प्रस्थान गर्नुभएको हो । भ्रमणका क्रममा प्रधानमन्त्री ओलीले चीन र रुसका राष्ट्रपतिसहित ६ देशका सरकार प्रमुखसँग द्विपक्षीय वार्ता गर्ने परराष्ट्र मन्त्रालयले जनाएको छ ।

 प्रधानमन्त्री ओलीले भ्रमण अघि प्रतिनीधि सभामा जानकारी गराउँदै नेपाल–चीन मैत्रीपूर्ण सम्बन्ध थप सुदृढ हुने र अन्तर्राष्ट्रिय मञ्चमा नेपालको अवधारणा र प्राथमिकता स्पष्ट रुपमा प्रस्तुत हुने विश्वास व्यक्त गर्नुभएको थियो । उहाँकाअनुसार भ्रमणका क्रममा चीनका राष्ट्रपति सी तथा उपराष्ट्रपति हान चङ्गसँग द्विपक्षीय भेटवार्ता गर्ने कार्यक्रम समेत रहेको छ । प्रधानमन्त्री ओलीले बेइजिङमा आयोजित फासिवाद विरोधी युद्ध र जापानी अतिक्रमण विरुद्धको ८०औँ वार्षिकोत्सव समारोहमा सहभागिता जनाउनु हुनेछ ।

यसैबीच, प्रधानमन्त्री ओलीको भ्रमणलाई लिएर सत्तारुढ र प्रतिपक्ष दलले कूटनीतिक माध्यमबाट नेपालको भूमि फिर्ता गराउन लाग्नुपर्नेमा साझा धारणा राखेका छन् ।