काठमाडौं महानगर प्रहरीको कार्यशैलीलाई लिएर आलोचना भइरहेका बेला मेयर बालेन्द्र साहले भने नगर प्रहरीको प्रशंसा गर्नुभएको छ ।

 महानगर प्रहरी दिवसका अवसरमा आज आयोजित एक कार्यक्रमलाई सम्बोधन गर्दै मेयर शाहले काठमाडौं महानगरपालिकालाई चिनाउन नगर प्रहरीले महत्वपूर्ण भूमिका खेलेको बताउनुभयो ।

महानगर क्षेत्रभित्रका अनधिकृत संरचना हटाउने, सडक पेटीको अतिक्रमण रोक्ने तथा सवारी व्यवस्थापनको क्षेत्रमा नगर प्रहरी परिचालन हुँदै आएका छन् । उपप्रमुख सुनिता डङ्गोलले व्यक्तिको नभई संस्थाको प्रतिनिधिको रुपमा काम गर्न नगर प्रहरीलाई आग्रह गर्नुभयो ।

महानगर प्रहरीले स्थापना दिवसका अवसरमा स्वयम्भूनाथ र वसन्तपुर दरबार क्षेत्रमा सरसफाइ गर्नुका साथै विभिन्न स्थानमा वृक्षारोपणसमेत गरेको थियो । विक्रम सम्वत् २०५० भदौ १४ गते स्थापना भएको महानगर प्रहरीमा अहिले ३ सय ६२ जना कार्यरत छन् ।