चीन भ्रमणको पहिलो दिन प्रधानमन्त्री केपी शर्मा ओलीले त्यहाँ राष्ट्रपति सी चिनफिङबीच भेटवार्ता गर्नुभएको छ ।

तियानजिनको अतिथि गृहमा प्रधानमन्त्री ओली र चिनियाँ राष्ट्रपतिबीच भेटवार्ता भएको प्रधानमन्त्रीको निजी सचिवालयले जनाएको छ । भेटघाटमा प्रधानमन्त्री ओलीको भ्रमण टोलीका सदस्यहरु समेत सहभागी थिए । सांघाई सहयोग संगठन (एससीओ) को सम्मेलनमा सहभागी हुन चिनियाँ राष्ट्रपतिको निमन्त्रणामा प्रधानमन्त्री ओली चीन जानुभएको हो ।

प्रधानमन्त्री ओलीले पर्सी सोमबार तियानजिनमा हुने सांघाई शिखर सम्मेलनलाई सम्बोधन गर्नुका साथै विभिन्न देशका राष्ट्रप्रमुख तथा सरकार प्रमुखसँग भेटवार्ता गर्ने जनाइएको छ ।

भ्रमणमा प्रधानमन्त्री पत्नी राधिका शाक्य, शिक्षा, विज्ञान तथा प्रविधिमन्त्री रघुजी पन्त, संस्कृति, पर्यटन तथा नागरिक उड्डयनमन्त्री बद्रीप्रसाद पाण्डे, नेपाली कांग्रेसका उपसभापति पूर्णबहादुर खड्का, प्रधानमन्त्रीका आर्थिक तथा विकास सल्लाहकार डा. युवराज खतिवडा लगायत सहभागी हुनुभएको छ । प्रधानमन्त्री ओली आगामी बुधबार स्वदेश फर्कनुहुनेछ ।