बझाङमा पहिरोले १७ वटा घर बगायो
असार २०, २०७७ | बझाङ
शनिबार बिहान गएको पहिरोले बझाङमा १७ वटा घर बगाएको छ । केदारस्युँ गाउँपालिका वडा नम्बर ८, मल्लेसी गाउँमा पहिरोले घर बगाएको हो ।
पहिरोबाट ठूलो मानवीय क्षति भएको अनुमान छ । बिहान २ बजे तिर पहिरो गएको हो । पहिरो गएको गाउँमा प्रहरी सहितको उद्धार टोली बिहानै गएको भएपनि पुग्न सकेको छैन ।
मल्लेसी जाने बाटो खोलैखोला भएर जानुपर्ने र माथिबाट पहिरो खसिरहेका कारण उद्धार टोली त्यहाँ पुग्न नसकेको स्थानीय दिपक बोहराले बताए ।
बोहराले ५ जनाको शव भेटिएको र २८ देखि ३० जना सम्म बेपत्ता रहेको अपुष्ट जानकारी आएको बताए ।
उद्धार गर्न गएको प्रहरी टोलीले बाटो बनाएर घटनास्थल जाने प्रयास गरिरहेको डीएसपी गणेश बमले जानकारी दिनुभयो ।
यद्यपि, त्यहाँ उद्धार टोली पुग्नका लागि अझै दुई घण्टा भन्दा बढी लाग्न सक्ने उहाँले बताउनुभयो ।
बझाङकी प्रतिनिधि सभा सदस्य आसा विकले हेलिकप्टर मार्फत उद्धार टोली घटनास्थल पठाउनका लागि प्रयास भईरहेको जानकारी दिनुभयो ।