गुल्मीको मुसिकोट नगरपालिका वडा नं १, बिसौनामा पहिरोले घर पुरिँदा ४ जनाको मृत्यु भएको छ । पहिरोमा परी २ जना घाइते भएका छन् । जिल्लाप्रहरी कार्यालय गुल्मीका अनुसार घटनामा ६७ वर्षिय हुकुम बिक, उनका छोरा ४६ वर्षीय गोरे बिक, हुकुमकी बहिनी ६६ वर्षीया मसुरी विक र नातीनी साढे दुई वर्षीया रियन्सी विकको मृत्यु भएको हो । 

जिल्ला प्रहरी कार्यालय गुल्मीका प्रहरी निरिक्षक रामकुमार केसीले पहिरोमा पुरिएर ३१ वर्षीय विष्णु विक र उनकी श्रीमती २३ वर्षीया मुना विक घाइते भएको जानकारी दिनुभयो । लगातारको वर्षापछि घरमाथीबाट लेदो सहितको पहिरो आएको थियो । घटनापछि उद्धार गरिएका दुईजनाको स्थानीय स्वास्थ्यचौकीमा उपचार भइरहेको हाम्रा सहकर्मीले जनाएका छन् ।