संसदीय छानबिन विशेष समितिले सहकारी सञ्चालकसँग बयान लिने काम जारी
![](http://radio-assets-api.ekantipur.com/thumb.php?src=http://radio-assets-cdn.ekantipur.com/uploads/source/news/2024/third-party/samiti-1723790202.jpg&w=700&height=600)
श्रावण ३२, २०८१
सहकारी रकम दुरुपयोग सम्बन्धमा गठित संसदीय छानबिन विशेष समितिले सहकारी सञ्चालकसँग बयान लिने काम जारी राखेको छ । देशभरका समस्याग्रस्त विभिन्न सहकारीका पीडित, सरोकारवाला पक्ष, विज्ञ लगायतसँग छलफल गरेको समितिले सहकारी हिनामिना प्रकरणमा जोडिएकासँग बयान लिने कामलाई जारी राखेको हो । सहकारी प्रकरणमा आरोपित एवं जोडिएका सञ्चालकहरुसंग समितिले १९ जनासंग बयान लिइसकेको जनाएको छ ।
यसैबीच, समितिले आज पनि चार जनासंग बयान लिने तयारी गरेको छ । सिंहदरबारस्थित एक हलमा बस्ने बैठकमा सुप्रिम सहकारीका तत्कालिन सचिव दिपेश पुनसंग बयान लिने तयारी गरिएको समिति सदस्य सरिता भुसालले जानकारी दिनुभयो । त्यसलगत्तै सनराइज बचत तथा ऋण सहकारी संस्थाका अध्यक्ष नगेन्द्रबहादुर रिमाल, सुनसरीको वराह बचत तथा ऋण सहकारी संस्थाका अध्यक्ष मानबहादुर विश्वकर्मासंग बयान लिने भुसालको भनाइ छ ।
विभिन्न सहकारीको वचत दुरुपयोगमा संलग्नका रूपमा आरोपित व्यक्तिहरूमध्ये हिजो ओरियन्टल,प्यासिफिक सेभिङ, कोहिनुर हिल, कन्जुमर र भेगास वचत तथा ऋण सहकारी संस्थाका अध्यक्ष तथा मुख्य संचालक सुधिर बस्नेतलाई समितिको बैठकमा ल्याई सोधपुछ गरिएको थियो ।