वैदेशिक रोजगारीमा विभिन्न देशमा पठाइदिन्छु भन्दै ठगी गरेको आरोपमा ३ जनालाई प्रहरीले पक्राउ गरेको छ ।

वैदेशिक रोजगारमा आकर्षक तलबको प्रलोभनमा पारी विभिन्न देश पठाइदिन्छु भन्दै रकम ठगी गरेको आरोपमा उनीहरुलाई काठमाडौं र ललितपुरका विभिन्न स्थानबाट प्रहरीले पक्राउ गरेको हो । पक्राउ पर्नेमा सर्लाहीका २८ वर्षीय राकेश कुमार रावत, काभ्रेपलाञ्चोकका ३३ वर्षीय दुधराज थिङ र दाङ तुल्सीपुरकी ३४ वर्षीया प्रभा श्रेष्ठ छन् ।

पक्राउ परेका मध्ये राकेशले मौरिसस पठाइदिन्छु भन्दै १ जनाबाट ६ लाख ४५ हजार रुपैयाँ, दुधराजले क्यानडा पठाइदिन्छु भन्दै १ जनाबाट ७ लाख ५० हजार रुपैयाँ र प्रभाले सिंगापुर पठाइदिन्छु भन्दै १ जनाबाट ७ लाख ८ हजार रुपैयाँ लिई सम्पर्कविहीन भएको भन्ने उजुरी परेको थियो । पक्राउ परेका उनीहरूलाई आवश्यक अनुसन्धान तथा कारवाहीको लागि वैदेशिक रोजगार विभाग पठाइएको प्रहरीले जनाएको छ ।