नेपाल पुलिस र त्रिभुवन आर्मी क्लबले पोखरामा आयोजित पाँचौं टाइगर कप भलिवलमा पुरुषतर्फ पहिलो क्वालिफायर खेल्ने भएका छन् ।

समूहको अन्तिम खेलमा भारतको सुनिल भलिबल क्लबलाई ३–२ को सेटमा पराजित गर्दै आर्मीले पहिलो क्वालिफायर खेल्ने भएको हो । आर्मी शीर्ष र पुलिस दोस्रो स्थानमा रहँदै पहिलो क्वालिफायरमा स्थान पक्का गरेका छन् ।

२ खेलबाट १ अंक जोडेको सुनिल क्लब तेस्रो स्थानमा रहँदै इलिमिनेटरमा पुगेको छ । पुरुषतर्फकै अर्को खेलमा हेल्प नेपाल स्पोट्र्स क्लबलाई हराउँदै गण्डकी प्रदेश इलिमिनेटरमा प्रवेश गरेको छ । हेल्प नेपाललाई ३–१ सेटले पराजित गर्दै गण्डकी इलिमिनेटरमा प्रवेश गरेको हो ।

यसअघि बिहान भएको खेलमा महिलातर्फ नेपाल पुलिस क्लबलाई ३–० को सोझो सेटमा पराजित गर्दै न्यु डायमन्ड स्पोट्र्स क्लब दोस्रो क्वालिफायरमा प्रवेश गरेको छ । न्यु डायमन्डले अब फाइनल प्रवेशका लागि सशस्त्र प्रहरी बल एपिएफ र आयोजक टाइगर ग्रुपबिचको खेलमा पराजित हुने टोलीसँग प्रतिस्पर्धा गर्नेछ ।