जय ट्रफी मेन्स एलाइट कप क्रिकेटका लागि बागमती प्रदेशको टोली घोषणा भएको छ ।

 बागमती प्रदेश क्रिकेट संघले आज नेपाली राष्ट्रिय टोलीका स्पिनर सन्दीप लामिछानेको कप्तानीमा १५ सदस्यीय अन्तिम टोलीको घोषणा गरेको हो । बागमती प्रदेशले गत साता प्रारम्भिक टोलीमा १८ खेलाडीलाई बोलाएको थियो । 

नेपाल क्रिकेट संघको आयोजनामा पुस २१ देखि २९ गतेसम्म हुने प्रतियोगिता मधेश प्रदेशको जनकपुर र वीरगन्जमा हुनेछ । पहिलो संस्करणको प्रतियोगितामा प्रधानमन्त्री कप राष्ट्रिय एकदिवसीय क्रिकेट प्रतियोगिताको शीर्ष चार टोली नेपाल पुलिस क्लब, त्रिभुवन आर्मी क्लब, बागमती प्रदेश तथा मधेश प्रदेशको सहभागिता रहने छ ।

सिंगल राउण्ड रोबिन लिगका आधारमा संचालन हुने प्रतियोगिताको शीर्ष २ टोलीबीचमा फाइनल हुनेछ । क्यानका अनुसार लिग चरणका खेल दुई दिवसीय र फाइनल तीन दिवसीय ढाँचामा खेलाइने छ । जनकपुर र वीरगंजमा हुने प्रतियोगितामा बागमती प्रदेशको लिगका सबै खेल जनकपुरमा हुनेछ । बागमतीले उद्घाटन खेलमा मधेश प्रदेशको सामना गर्नेछ ।