एन्फा महिला फुटबल लिगमा पुलिसले उत्कृष्ट सुरुवात गरेको छ । वालिङमाथि उसले फराकिलो ५–० गोल अन्तरको जित निकालेको छ । 

सातदोबाटोको एन्फा कम्प्लेक्समा भएको खेलमा पुलिसका लागि अनुष्का शर्मा र सम्झना लावतीले २–२ गोल गरे । पुलिसका लागि अर्को एक गोल पूजा रानाको नाममा रह्यो । पहिलो हाफमै पुलिसले २–० को अग्रता बनाएको थियो । जितसँगै ३ अङ्क जोडेको पुलिस तालिकाको शीर्ष स्थानमा छ ।

 आर्मीको पनि ३ अङ्क नै छ । वालिङ भने फराकिलो हारका कारण अन्तिम स्थानमा पुगेको छ । पुलिसले लिगको पहिलो चरणमा पनि वालिङलाई २–० ले हराएको थियो । लिगको दोस्रो चरणमा पाँच टिमको सहभागिता छ । शीर्ष चारमा रहनेले टोलीले प्ले अफ खेल्नेछन् । प्रतियोगिता अन्तर्गत भोलि एपीएफ र वागमती प्रदेशबीच प्रतिस्पर्धा हुनेछ ।