नटिङ्घम फरेस्टले इंग्लिस प्रिमियर लिग फुटबलमा म्यानचेस्टर युनाइटेडलाई पराजित गरेको छ । सिटी ग्राउण्ड स्टेडियममा गएराति भएको खेलमा घरेलु टोली नटिङ्घम फरेस्टले म्यान युनाइटेडलाई १–० ले हराएको हो । 

फरेस्टको जितमा खेलको पाँचौ मिनेटमा एन्टोनी एलांगाले गरेको गोल निर्णायक बन्यो । यो जितपछि नटिङ्घम फरेस्ट ३० खेलबाट ५७ अंकका साथ लिग तालिकाको तेस्रो स्थानमा रहेको छ । म्यान युनाइटेड भने ३७ अंकका साथ तालिकाको १३ औं स्थानमा छ ।

लिगको अर्को खेलमा आर्सनलले पाहुना टोली फुलहमलाई पराजित गर्दै तीन अंक जोडेको छ । घरेलु मैदान इमिरेट्स स्टेडियममा गएराति भएको खेलमा आर्सनलले पाहुना टोली फुलहमलाई २–१ गोलले पराजित गरेको हो । 

मिकेल मेरिनोले खेलको ३७ मिनेटमा आर्सनललाई अग्रता दिलाए । बुकायो साकाले खेलको ७३ औं मिनेटमा अर्को गोल गर्दै घरेलु टोलीको अग्रता दोब्बर पारे । 

दोस्रो हाफको अतिरिक्त समयमा रोड्रिगो मुनिजले फुलहमका लागि सान्त्वना गोल फर्काए । यो नतिजापछि दोस्रो स्थानमा रहेको आर्सनलले ३० खेलबाट ६१ अंक जोडेको छ । एक खेल कम खेलेको लिभरपुल ७० अंकका साथ तालिकाको शीर्ष स्थानमा छ ।