नेपाल बार एशोसिएशनको नयाँ नेतृत्व चयनका लागि अहिले निर्वाचन भइरहेको छ । २७ औँ केन्द्रीय कार्यसमितिको निर्वाचनका लागि बिहान ८ बजेबाट मतदान सुरु भएको हो । मतदान दिउँसो ४ बजेसम्म हुनेछ । बारको अध्यक्षका लागि ५ जनाको उम्मेद्वारी परेको छ । बृहत लोकतान्त्रिक, प्रगतिशील, पेसागत, राष्ट्रवादी एवं समावेशी कानुन व्यवसायी समूहबाट वरिष्ठ अधिवक्ता प्राध्यापक विजयप्रसाद मिश्र र व्यावसायिक कानुन व्यवसायी समूहबाट वरिष्ठ अधिवक्ता रमनकुमार श्रेष्ठबीच मुख्य प्रतिस्पर्धा हुने देखिएको छ । 

दुवै पक्षले न्यायालयको सुधारका लागि आ–आफ्नो प्रतिबद्धता अघि सारेका छन् । अन्य तीनजनाले भने अध्यक्षमा स्वतन्त्र उमेद्वारी दिएका छन् । स्वतन्त्रबाट बारको अध्यक्षका लागि अधिवक्ता राजु कैती, अधिवक्ता उज्वल घिमिरे र अधिवक्ता आषिश पौडेलले उम्मेदवारी दिनु भएको हो । बारको २५ सदस्यीय नयाँ कार्यसमितिका लागि ५७ जनाले उम्मेदवारी दिएका छन् । मिश्रको समूहबाट महासचिवमा वरिष्ठ अधिवक्ता केदारप्रसाद कोइराला उम्मेदवार हुनुहुन्छ भने श्रेष्ठको समूहबाट अधिवक्ता यज्ञमणि न्यौपाने उम्मेदवार बन्नु भएको छ । 

प्रमुख निर्वाचन अधिकृत वरिष्ठ अधिवक्ता रामकृष्ण निरालाका अनुसार बारको चुनावमा भोट हाल्नेको संख्या ९ हजार ९ सय ५७ छ । काठमाडौँ र बाहिर गरी जम्मा ३६ वटा मतदान केन्द्र रहेका छन् । काठमाडौँ मतदान केन्द्र सर्वोच्च अदालतको परिसरमा राखिएको छ । काठमाडौं केन्द्रमा करिब ६ हजार मतदाता रहेका छन् ।