जाजरकोटको कुसे गाउँपालिका–९ पैङ्कमा केन्द्रबिन्दु बनाएर गएराति गएको भूकम्पमा परी आठ जना घाइते भएका छन् । पैङ्कमा केन्द्रबिन्दु बनाएर गएराति ५ दशमलव २ र ५ दशमलव ५ म्याग्निच्युडका दुई वटा भूकम्प गएको थियो । 

राष्ट्रिय विपद् जोखिम न्यूनीकरण तथा व्यवस्थापन प्राधिकरणले सम्बन्धित जिल्ला प्रशासन कार्यालय तथा राष्ट्रिय आपत्कालीन कार्य सञ्चालन केन्द्रबाट प्राप्त विवरण अनुसार रुकुम पश्चिममा दुई र जाजरकोटमा ६ जना घाइते भएको जनाएको हो । 

प्राधिकरणका प्रवक्ता रामबहादुर केसीले जाजरकोट, रुकुम पश्चिम र कालीकोटका केही निजी आवास तथा सरकारी भवनमा सामान्य क्षति भएको विवरण प्राप्त भएको बताउनुभयो ।

अधिकांश व्यक्तिहरु बसिरहेका भवन संरचना भत्किएर भन्दा पनि भूकम्प आएको बेला आत्तिएर घरको छत वा अग्लो भागबाट हामफाल्दा, असावधानीपूर्वक घरबाहिर अत्तालिएर भाग्न खोज्दा घाइते भएका पनि प्राधिकरणले जनाएको छ ।

प्राधिकरणले सूचनामा जारी गर्दै भूकम्प गएको बेला वरपरको स्थिति समेत विचार गर्दै सावधानीपूर्वक सुरक्षित स्थानमा जान अनुरोध गरेको छ । आगामी दिनमा भवन निर्माण गर्दा भूकम्प प्रतिरोधी हुने गरी बनाउन एवं भूकम्पीय सुरक्षाको नियमको पालना गर्न पनि प्राधिकरण आग्रह गरेको छ । 

सूचनामा भनिएको छ, 'भूकम्प गएको बेला वरपरको स्थिति समेत विचार गर्दै सावधानीपूर्वक सुरक्षित स्थानमा जान, अब उप्रान्त भवन संरचना निर्माण गर्दा भूकम्प प्रतिरोधी हुने गरी बनाउन एवं भूकम्पीय सुरक्षाको दृष्टिकोणबाट पालना गर्नुपर्ने नियमहरुको अनुशासनपूर्वक पालना गर्न सबैमा प्राधिकरण विशेष अनुरोध गर्दछ ।'