नेपाल क्रिकेट संघ क्यानले हङकङमा हुने चार देशीय टी–२० सिरिजका लागि नेपाली राष्ट्रिय क्रिकेट टोलीको घोषणा गरेको छ । क्यानले रोहित पौडेलको कप्तानीमा १४ सदस्यीय अन्तिम टोलीको घोषणा गरेको हो । 

प्रधानमन्त्री कप राष्ट्रिय क्रिकेट प्रतियोगिता सकिए लगत्तै नेपाली टोलीको बन्द प्रशिक्षण भैरहवामा भइरहेको छ । सोही आधारमा राष्ट्रिय टोलीको छनोट गरिएको क्यानले जनाएको छ । 

टोलीमा कप्तान पौडेलसँगै आसिफ शेख, कुशल भुर्तेल, लोकेश बम, बसिर अहमद, दीपेन्द्रसिंह ऐरी छ्न । यस्तै, कुशल मल्ल, गुलशन झा, सोमपाल कामी, करण केसी, नन्दन यादव, ललित राजवंशी, शाहव आलम र रिजन ढकाल पनि टोलीमा छनोट भएका छन् । बसिरले २ र नन्दनले ३ वर्षपछि राष्ट्रिय टोलीमा पुनरागमन गरेका हुन् ।

प्रतियोगितामा नेपालले आगामी बुधबार कतार, बिहीबार कुवेत र आउँदो शनिबार हङकङसँग खेल्दै छ । भैरहवामा नेपाली टोलीलाई ज्ञानेन्द्र मल्लले प्रशिक्षण दिँदै आएका छन् । 

क्यानले अघिल्लो साता राष्ट्रिय टोलीको प्रशिक्षकमा अस्ट्रेलियाका स्टुवार्ट ललाई छनोट गरेको थियो । तर, उनी अझै नेपाल आइसकेका छन् । अस्ट्रेलियाबाट १ टेस्ट र ५४ एकदिवसीय अन्तर्राष्ट्रिय खेलिसकेका स्टुवार्टलाई अप्रिलदेखि लागू हुने गरी २ वर्षका लागि नियुक्त गरिएको क्यानले जनाएको छ ।