पोखरा थन्डर्सले नेपाल सुपर लिग फुटबलमा विजयी सुरुवात गरेको छ । त्रिपुरेश्वरस्थित दशरथ रंशगालामा भएको खेलमा पोखराले काठमाडौं रेजर्सलाई २–० गोलले पराजित गर्दै पहिलो जित हात पारेको हो । 

पोखराले खेलको २५ औं मिनेटमा स्टेफन समिर बिनोङको हेडर गोल मार्फत अग्रता लिएको थियो । खेलको ५८ औं मिनेटमा पोखराको सुदिल राईको प्रहार काठमाडौंका अलिजोन अलिजोनोभलाई डिफ्लेक्ट हुँदै गोलमा परिणत भयो । 

काठमाडौं दोस्रो हाफमा पनि खेलमा फर्कन सकेन । पोखराले आफ्नो तेस्रो खेलमा पहिलो जित निकाल्दै महत्वपूर्ण ३ अंक जोडेको छ । यसअघिका दुई खेलमा भने पोखरा पराजित भएको थियो । 

पोखरा आफ्नो पहिलो खेलमा एफसी चितवनसँग २–० ले र दोस्रो खेलमा साविक विजेता ललितपुर सिटीसँग २–१ ले पराजित भएको थियो । काठमाडौको भने यो पहिलो हार हो । तीन खेलबाट काठमाडौंको मात्र २ अंक छ ।

आजै हुने दोस्रो खेलमा ललितपुर सिटी एफसी र धनगढी एफसीबीच प्रतिस्पर्धा भईरहेको छ । गत संस्करणको फाइनलमा ललितपुरले धनगढीलाई हराउँदै उपाधि जितेको थियो ।