मुक्तिनाथ विकास बैंकले स्थापनाको १८ औं वर्ष पूरागरी १९ औ वर्षमा प्रवेश गरेको अवसरमा रेडियो कान्तिपुरका पाल्पा संवाददाता माधव प्रसाद अर्यालसहित तीन जना पत्रकारलाई पुरस्कृत गरेको छ । देशभरबाट आवेदन आह्वान गरी मुक्तिनाथ उत्कृष्ट कृषि पत्रकारिता पुरस्कार प्रदान गरेको हो ।

सो पुरस्कार प्राप्त गर्ने पत्रकारहरुमा रेडियो कान्तिपुरका पाल्पा संवाददाता अर्यालसहित जुम्लाका पत्रकार सागर परियार,काठमाडौंकी कौशिला कुँवर छन् । अर्याललाई १५ हजार, परियारलाई ३५ हजार र कुँवरलाई २५ हजार नगदसहित प्रमाणपत्रले सम्मान गरिएको मुक्तिनाथ विकास बैंकले जनाएको छ । बैंकले कृषि क्षेत्रमा खोज अनुसन्धान गरी लेख तथा समाचार प्रकाशित गर्ने पत्रकारहरुबाट पुरस्कारका लागि आवेदन आह्वान गरेको थियो ।

संवाददाता अर्याल पाल्पामा दुई दशक बढी समयदेखि कान्तिपुर मिडियामा संलग्न रही पत्रकारिता गर्दै आएका छन् । वार्षिकोत्सवका अवसरमा बैंकले वातावरण संरक्षण र जलवायु परिवर्तन रोकथाम विषयलाई लक्षित गरी ८ देखि १० कक्षासम्मका विद्यार्थीबीच राष्ट्रव्यापी रूपमा चित्रकला प्रतियोगिता आयोजना गरेको थियो ।