पोखरामा आयोजित पाँचौं संस्करणको टाइगर कप भलिवलमा पुरुषतर्फ भारतको सुनिल कुमार भलिबल क्लब, नेपाल पुलिस क्लब र त्रिभुवन आर्मी क्लब विजयी भएका छन् ।

पोखरा रंगशालास्थित भलिबल कोर्टमा भएको खेलमा भारतको सुनिल कुमार भलिबल क्लबले टीप टप हेल्प नेपाल क्लबमाथि ३–१ को सेटमा जित निकालेको हो ।

यस्तै आजै भएको दोस्रो खेलमा गण्डकी प्रदेशको टिम नेपाल पुलिस क्लबसँग पराजित भएको छ । गण्डकी प्रदेश पुलिससँग ३–२ को सेटमा पराजित भयो ।

तेस्रो खेलमा विभागीय टोली सशस्त्र प्रहरी बलको एपीएफ टोली त्रिभुवन आर्मी क्लबसँग ३–० को सोझो सेटमा पराजित भएको छ । पहिलो सेटबाटै दबाबमा राखेको आर्मीले एपीएफमाथि २५–१८, २५–२३ र २५–१५ ले जित निकालेको हो ।

महिलातर्फ आज आयोजक टोलीले त्रिभुवन आर्मी क्लबलाई सोझो सेटमा पराजित गरेको छ । पोखरा रंगशालास्थित भलिबल कोर्टमा बिहान भएको खेलमा आयोजक टोलीले आर्मीलाई ३–० को सोझो सेटमा पराजित गरेको हो । आयोजक टोलीले आर्मीमाथि २५–१४, २५–११ र २५–२१ को सेटमा जित निकाल्यो । प्रतियोगिता माघ १९ गतेसम्म सञ्चालन हुनेछ ।