आहा रारा पोखरा गोल्ड कप फुटबल प्रतियोगिताको तयारी अन्तिम चरणमा पुगेको छ । सहारा क्लब पोखराको आयोजनामा हुने २४ औं संस्करण पोखरा रंगशालामा यहि माघ २२ देखि फागुन ३ गतेसम्म हुनेछ ।

प्रतियोगितामा अहिले सम्म २ विदेशीसहित ११ टोलीको सहभागिता रहने आयोजकले जनाएको छ । प्रतियोगितामा ए डिभिजनका टोलीमा विजेता त्रिभुवन आर्मी फुटबल क्लब, थ्री स्टार क्लब, मछिन्द्र, एनआरटी, चर्च ब्वाइज, संकटा क्लब, र नेपाल पुलिस क्लब छन् ।

आयोजक सहारा, एपीएफ, बिग्रेड ब्वाइज युके र भारत सिक्किमको थन्डर बोल्ट नर्थ युनाइटेडले पनि प्रतिस्पर्धा गर्नेछन् । प्रतियोगिताको विजेता टोलीले १२ लाख १ हजार र दोस्रो हुने टोलीले ६ लाख १ हजार रुपैयाँ प्राप्त गर्नेछन् । प्रतियोगितामा १ करोड ४२ लाख २० हजार रुपैयाँ खर्च हुने अनुमान गरिएको छ ।