अर्जुन ट्रफी राष्ट्रिय क्रिकेट प्रतियोगिताको उपाधिका लागि सीवाईसी अत्तरिया र डडेलधुराको फ्रेन्ड्स युथ क्लबबीच प्रतिस्पर्धा हुने भएको छ । 

धनगढीस्थित फाप्ला अन्तर्राष्ट्रिय क्रिकेट मैदानमा हुने सीवाईसी अत्तरिया र फ्रेन्ड्स युथ क्लबबीच फाइनल खेल दिउँसो एक बजे सुरु हुनेछ । 

अत्तरियाले दोस्रो सेमिफाइनलमा डीसीए धनगढीमाथि ६ विकेटको रोमाञ्चक जित हात पार्दै उपाधि नजिक पुगेको हो । 

पहिलो सेमिफाइनलमा नेपाली राष्ट्रिय टोलीका ओपनिङ ब्याटर कुशलको अलराउन्ड प्रदर्शनमा फ्रेन्ड्स युथ क्लबले न्यू होराइजन बुटवललाई ५ विकेटले पराजित गर्दै उपाधि यात्रा तय गरेको थियो । 

माघ १९ देखि सुरु भएको प्रतियोगितामा आठ टिमको सहभागिता रहेको थियो । धनगढी क्षेत्रका प्रशिक्षक अर्जुन खड्काको स्मृतिमा गो ड्रिमर्सले आयोजना गरेको प्रतियोगिताको विजेताले १० लाख र उपविजेताले ५ लाख रुपैयाँ प्राप्त गर्नेछन् । 

प्रतियोगिताको सर्वोकृष्ट खेलाडीले नगद एक लाख रुपैयाँ पाउने आयोजकले जनाएको छ । उत्कृष्ट ब्याट्सम्यान, उत्कृष्ट बलर र उदयमान खेलाडीले जनही ५०÷५० हजार रुपैयाँ पाउनेछन् ।